👣 A Milla Diaria: 10.000 pasos cara a unha vida máis activa e saudable

No CEIP de Laza, po 5º ano consecutivo, seguimos comprometidos coa promoción de hábitos de vida activa e saudable a través da nosa participación no Proxecto de Vida Activa e Deportiva (PVAD). Entre as diferentes iniciativas que desenvolvemos ao longo do curso destaca a Milla Diaria, unha proposta que converte a actividade física nun hábito cotián para todo o alumnado.

O principal reto consiste en que cada alumno e alumna alcance, de maneira individual, 10.000 pasos diarios, o que equivale aproximadamente aos 60 minutos de actividade física de intensidade moderada ou vigorosa recomendados pola Organización Mundial da Saúde (OMS). Deste xeito, promovemos que o movemento forme parte da rutina diaria, tanto dentro como fóra do centro educativo.

Para acadar este obxectivo, realizamos percorridos diarios durante a xornada escolar, camiñando ou trotando polos espazos do centro. Ademais, aproveitamos saídas, rutas, excursións e outras actividades para seguir sumando pasos, demostrando que existen moitas formas diferentes de manterse activo.

O seguimento deste reto realízase mediante pulseiras de actividade física, sincronizadas cunha aplicación de podómetro, que permiten rexistrar os pasos realizados e facer un seguimento da evolución de cada participante. Esta ferramenta convértese nun elemento motivador que anima ao alumnado a superarse cada día e a ser consciente da importancia de manter un estilo de vida activo.

A través desta iniciativa non só buscamos incrementar a práctica diaria de actividade física, senón tamén promover hábitos de vida saudables relacionados coa alimentación equilibrada, a hixiene, o descanso e a prevención do sedentarismo asociado ao uso excesivo das pantallas. Ao mesmo tempo, contribuímos a mellorar a condición física, favorecer a concentración nas aulas, reforzar a autoestima e fomentar valores como o esforzo, a constancia, a responsabilidade e o compañeirismo.

Porque estamos convencidos de que os grandes cambios comezan con pequenos xestos, seguimos dando pasos cara a unha escola máis activa, máis saudable e máis feliz. Cada paso conta, e cada día é unha nova oportunidade para coidar da nosa saúde.