OBRADOIRO DE RADIO

O noso alumnado participou nun interesante obradoiro de radio escolar, unha experiencia na que puideron achegarse ao mundo da comunicación e descubrir todo o que hai detrás dun programa de radio.

A actividade estivo guiada por Damián Alonso, profesional cunha ampla experiencia no ámbito da comunicación, que traballa no proxecto Ponte nas Ondas e tamén desenvolve a súa carreira no mundo das dobraxes e do teatro. Da súa man, o alumnado puido coñecer de primeira man como se prepara e se realiza un programa de radio.

Durante o obradoiro aprenderon, en primeiro lugar, a modular a voz, algo fundamental para transmitir as mensaxes con claridade, expresividade e ritmo. A través de diferentes exercicios prácticos, practicaron a entoación, a respiración e a proxección da voz.

Outro dos aspectos que traballaron foi a elaboración dunha escaleta, é dicir, a estrutura que organiza os distintos contidos dun programa. Grazas a isto comprenderon a importancia de planificar ben cada sección para que todo funcione de maneira ordenada e dinámica.

Finalmente, chegou o momento máis esperado: gravar os seus propios contidos de radio. O alumnado non só participou como locutor ou locutora diante do micrófono, senón que tamén tivo a oportunidade de poñerse no papel de técnico ou técnica de son, aprendendo a manexar a mesa de mesturas e a controlar os diferentes elementos da gravación.

Foi unha actividade moi enriquecedora que permitiu ao alumnado desenvolver habilidades de expresión oral, traballo en equipo, creatividade e comunicación. Sen dúbida, unha experiencia motivadora que lles achegou ao fascinante mundo da radio.

Queremos agradecer especialmente a Damián Alonso a súa implicación, profesionalidade e a forma tan próxima e amena coa que compartiu os seus coñecementos co alumnado.

Seguiremos apostando por actividades que permitan aprender facendo e descubrir novas formas de expresar e comunicar.