MÉRCORES CON MOITO CONTO

Ao longo de todo o curso escolar desenvolvemos a actividade "Mércores con moito conto", unha iniciativa pensada para fomentar o gusto pola lectura e converter os libros nun punto de encontro para toda a comunidade educativa.

Cada mércores abríamos un espazo especial no que alumnado, profesorado e familias podían participar compartindo contos, historias, lendas e lecturas de todo tipo. A través destas sesións tivemos a oportunidade de escoitar diferentes voces, descubrir novos relatos e gozar de momentos únicos arredor da lectura.

Contamos coa participación dalgunha familia. Do mesmo xeito, o alumnado asumiu un papel protagonista en moitas ocasións, demostrando as súas habilidades lectoras e a súa capacidade para transmitir emocións a través das palabras.

Grazas a esta actividade, a lectura converteuse nunha experiencia compartida que favoreceu a convivencia, a comunicación e o intercambio entre todos os membros da comunidade educativa. Desde o centro queremos agradecer a implicación e o entusiasmo de todas as persoas que participaron nesta iniciativa e que contribuíron a facer de cada mércores un día cheo de historias, imaxinación e aprendizaxe.

Agardamos seguir compartindo moitos máis contos e momentos lectores nos vindeiros cursos.