RECANTO FAMILIAS E DOCENTES

Unha das iniciativas que estamos a desenvolver dentro do programa PLAMBE é a creación de diferentes espazos arredor da lectura, complementarios á nosa biblioteca central. Con esta proposta buscamos establecer unha conexión a nivel de centro que permita crear puntos de encontro e unión entre os distintos espazos educativos, facendo da lectura unha presenza constante na vida escolar.

A nosa intención é que os libros e os materiais de lectura saian das paredes da biblioteca e cheguen a outros lugares do centro, favorecendo momentos de lectura, reflexión e aprendizaxe en diferentes contextos e para todos os membros da comunidade educativa.

Dentro desta liña de actuación, creamos na entrada do centro un espazo especialmente pensado para as familias e o profesorado. Trátase dun recuncho acolledor e accesible, equipado con diferentes materiais de lectura que poden consultar durante os momentos de espera ou descanso.

Neste espazo poden atopar exemplares da prensa diaria, revistas relacionadas co ámbito educativo e unha selección de libros de diferentes temáticas. Ademais, dispuxéronse varias cadeiras para que quen o desexe poida sentarse tranquilamente, dedicar uns minutos á lectura e gozar dun momento de calma dentro da xornada.

Con esta iniciativa pretendemos fomentar o hábito lector máis alá das aulas, promovendo a lectura como unha actividade compartida e accesible para toda a comunidade educativa. Cremos que cada espazo pode converterse nun lugar para descubrir novas historias, aprender e intercambiar experiencias, fortalecendo así os vínculos entre familias, alumnado e profesorado.

Seguiremos traballando para crear novos recunchos lectores que contribúan a construír un centro cada vez máis conectado coa lectura e coa cultura.