Xogamos coa CDU e aprendemos a localizar libros na biblioteca

Na nosa biblioteca seguimos aprendendo a través do xogo. Nesta ocasión realizamos unha actividade moi especial para coñecer mellor a CDU (Clasificación Decimal Universal) e aprender a localizar correctamente os libros nos distintos espazos da biblioteca.

A proposta consistiu en combinar a lectura, a organización da biblioteca e a robótica educativa. Cada alumno e alumna escolleu un libro ao azar entre unha ampla variedade de exemplares: libros informativos, contos, libros de animais, natureza, arte, ciencia e moitos outros temas.

Unha vez identificado o tema do libro, o reto consistía en programar o Escornabot para que chegase ata a casilla correspondente á súa categoría dentro do taboleiro da CDU. Deste xeito, o alumnado foi descubrindo de maneira práctica e divertida como se clasifican os libros e como podemos atopalos na biblioteca.

A actividade permitiu traballar a orientación espacial, a lóxica, a programación básica e, ao mesmo tempo, familiarizarse coa organización dos fondos bibliotecarios. Ademais, a diversidade de libros empregados favoreceu que o alumnado coñecese as distintas seccións e materias presentes na nosa biblioteca.

Para rematar, recollimos todos os libros utilizados e, entre todos e todas, colocámolos no lugar que lles correspondía nos andeis. Esta última tarefa serviunos para poñer en práctica os coñecementos adquiridos e reforzar a importancia de manter a biblioteca organizada para que todas as persoas poidan atopar facilmente os recursos que precisan.

Aprender a usar a biblioteca tamén pode ser unha aventura chea de retos, descubrimentos e diversión!